PDF Pawlin Ralbawi Misual Hminthang Ih Nupi An Kai Nan An Suah Sal

August 26, 2022 zanlam ah ralbawi misual hminthang Major Nai Bo Bo ih nupi cu PDF pawlin an kai nan a pasal sualnak hi a innsang pawl thawn an pehtlaih aw lo tin a thaizing ah an suah sal.

Khual a tlawng ding thuhla cu PDF pawlin a thupten an rak theicia, lamzin ah an kai nan an suah sal. Major Nai Bo Bo cu December 5, 2021 ah lamzawhtu mino pawl cu motor in cakpin pahtu a si. Mino ṭhenkhat an thi ih ṭhenkhat cu an kai. January 4, 2022 ah Min Aung Hlaing in pasalṭha, miralṭha tin cawimawinak capi a pe.

PDF ṭuanvo neitu in, “Nai Bo Bo cu Yangon lamzawhnak ih mino pawl motor thawn pahtu a si. A nupi ih tapa khal ralhrang turu zet a si. Nai Bo Bo ih nupi hi kan kai nan a pasal ih sualnak thawn an pehtlaih aw lo tin kan suah sal” a ti.

Nai Bo Bo ih nupi le a rualnu cu khualtlawng tlang an si, Nai Bo Bo ih nupi lawng an kai. An kaih pekte ahcun ralbawi nupi a si lo thu a rel, asinan neta ah PDF nunau pawlin thu an sut ih a phuang aw. Hmatpungtin lem hmangin khual a tlawng thu pawl a relsuak ih an suah sal.

Be the first to comment

Leave a Reply

Your email address will not be published.


*