Philippine Ralkap Vanzam A Tla, Mithi Le Hliamtuar An Tam

Philippine ralkap vanzam cu July 4 nazi 11:30 hrawngah a cangsual ih a tla puak. Lockheed C-130 Hercules vanzam sungah vanzam mawngtu telin minung 96 an to ih ralkap deuh lawnglawng an si.

An ramsung ih tapung pawlkom Abu Sayyaf group do dingih training kai pawl an si. Jolo airport ih a tum laiah a cangsual ih airport kiangih ungti hmuan sungah ava tla puak dumdo.

Ungti hmuan ih um minung 7 a tlak ngah ih a hmun ah 3 an thi, ralkap ṭhenkhat cu vanzam par ihsin an dawp man. Runsuaktu pawlkom in hliamhma tuar le mithi pawl cu an thiar ih siizung ah an tlanpi.

Monday zing (July 5) ahcun mithi 50 hrawng an um thlang ih hliamtuar 49 an um tin an phuang. Hliamtuar lakah dinhmun sia zetzet khal an um lai ti a si, vanzam tlaknak san hi an zingzoi rero lai. Misual kuttuar ih tla si cu an zum lemlo.

Jolo vanzam cawlhhmun lamzin cu an ramsung ih airport dang aiin a tawi sawn ruangah ṭhenkhat pilot cu an buai ṭheu. Military chief of staff Gen. Cirilito Sobejan in “Vanzam cawlhhmun lamzin an palsual, an zuamsal zawngah an cangsual ih an va tla puak” a ti.

Be the first to comment

Leave a Reply

Your email address will not be published.


*