Phungyi Upa In Min Aung Hlaing Parih Thilthleng Ding Arak Relcia Mi

Kum 65 mi Min Aung Hlaing cu ralkap hotu commander arak ṭuanlai ah Mon State, Kyaik Hti Saung Sayadaw ava tong ih laksawng a pe, Sayadaw in a hmailam caan ih thilthleng dingmi ṭhenkhat a sim thei. Himi thuhla cu Sayadaw ih dungthluntu pakhat in midang hnenah a simsawng mi a si.

Kyaik Hti Saung Sayadaw in, “Tui ih na dinhmun ihsin khaisang na si ding, a sangbik dinhmun ah na um leh ding. Asinan duhham tuk aw hlah, na ngah dingmi aiih tam sawn ngah na duh asilen na hloral ding. Na duhham tuk asilen na umnak leiram na suahsan a ṭul ding, na umnak leiram na suahsan ding asilen China ram ah tlan aw hlah. Russia ram ah tlan aw” a ti.

Min Aung Hlaing hi ahlan ah mipi in an rak thei tuk lemlo. July 3, 1956 kum ah Dawai khawpi ah a piang, a nauhak lai a tlawngkaipi pawlin class sungah a ṭong mal tuk ruangah zohman in an kom duh lo an ti. Tlawng a kai theh hnuah ralkap ah a lut ih ralbawi pawl ih duhcaknak a co vivo.

Cutin 2021 kum thok ahcun Myanmar ramsung thuneihnak a la ih August 2021 ah Prime Minister dinhmun a peaw. Phungyi upa ih arak simcia vekin a sangbik dinhmun ahcun a thleng zo nan a duhham tuk ruangah tlaksiatnak lamzin a pan rero lai. Phungyi upa hi 2015 kum ah a thi zo, Min Aung Hlaing cu Phungyi upa ih arak relcia vekin Russia ram ah sahimnak hawlin a tlan leh tla a ṭul men thei.

Be the first to comment

Leave a Reply

Your email address will not be published.


*