Pitar Pakhat Cu A Fanu Le A Pasal (An Makpa) In Lamzin Kap Ah An Hlon

Myanmar, Mawlamyine ramsung, Waw khuate ih um pitar kum 85 mi Daw Khin Kyaing cu a fanu le a pasal (an makpa) in an cawm paih nawn lo ruangah lamzin kap ah an va hlon.

Daw Khin Kyaing in fanu 5 anei ih kum 3 liamzo ah a pasal in a thihsan, Daw Khin Kyaing hlontu cu a fanu upabik le a pasal an si. A fanu dang pawl cu hmun dangdang ah hnaṭuan dingin an poksuak thluh ih an thi maw, an nung ti khal an thei nawn lo.

A fanu nautabik cu Thailand ramah hnaṭuan dingin a feh ti lawng an thei ih tuini tiang a thuhla an thei nawn lo. A fanu upabik le a pasal in an va fin ih an umtlang hnuah pitar Daw Khin Kyaing cu an hmurem thei lo, an kawk ringring ih vei tampi an inn ihsin an dawisuak zo nan tlannak ding hmun a neih lo ruangah thinhar mangbang in aum ringring.

Cutin, a fanu le a pasal in an rem thei lo lawlaw ruangah a fanu in “Ka naunu ara tlung ih aumnak ah a lo hruai tum” tin Mawlamyine bus cawlh hmun ah an fehpi.

Daw Khin Kyaing in thilumdan a theithiam ruangah “Ka feh duh lo” a ti nan an makpa in motor a sang ih a norlut. Cutin, Mawlamyine bus cawlh hmun ah an va fehpi, pitar in “Hmun dangah in fehter hlah uh, nan tumtahmi ka thei thluh.

Keimahten cun ka buai tuk ding, Mawlamyine pitar putar umnak inn ah in ret sawn uh” a ti nan lamzin kap ah an ret ih an tlansan. Khuadai lakah aum ih a rilrawng tuk ruangah a ṭap cu kiangkap um pawlin an zangfak tuk ih ei le in ding an leisak.

Sumpai tla an pe ih runsuaktu pawlkom an kosak ih Mawlamyine pitar putar cawmnak lam in ‘a fale pawl ih siannak kan ngah lo ahcun kan la ngam lo’ an ti lawk nan a fale pawl cu an hawl ih an hmu thei nawn lo ruangah an la thotho. Tu’ahcun hnangamten in mibawmtu pawlkom hnenah aum zo.

Be the first to comment

Leave a Reply

Your email address will not be published.


*