PNO Ralkap In Tualsual Mi Fala A Kap That, Sumpai Ting 100 In Remawknak An Tuah

Shan State, Pa-O ralkap PNO/PNA sungtel Kaw Wida in June 14, 2022 zanlam nazi 6:00 hrawngah tualsung fala kum 22 mi Nang Kham Un cu meithal in a kap. Dawr ah thil lei dingin ava feh ih a lu ah arak kap, ziangruangah a kap ti cu an tarlang lo.

Nang Kham Un cu Taunggyi Hospital ah an tuamhlawm ih a lu sungih cerek cu an phorhsuak hnuah Saw San Tun Hospital ah an kuat. Saw San Tun Hospital ah an tuamhlawm ih ṭhatlam pan thei nawn loin June 21 sun ah a thi. Cumi hnuah PNO/PNA pawlin a innsang hnenah zangnadawmnak ah ting 100 an pe ih remawknak an tuah.

An sungkhat in, “Remawknak an tuah ih PNO in ting 100 an pe. An fanu te cu a thi zo ih buainak dang tuah an duh lo, annih cu meithal nei an si ih kannih cu mi pangai men kan si ruangah buainak dang neih kan duh lo” a ti.

Pa-O ralkap PNO/PNA pawl hi ralhrang thawn hna an ṭuantlang ṭheu. Sualnak nei lo khuasung mi pawl an kai ih an hringhro, diklo zetin sumpai an dil. Tualsung nuanu pawl khal an hmuhsuam ṭheu. Mi kap thattu Kaw Wida cu hremnak zianghman an pe lo ruangah khuatlang hruaitu upa pawl cu an lungawi lo zet.

Khuami pakhat in, “Mi kap thattu cu vengsung ah aum nawn lo. Khuatlang hruaitu pawl a phone ih a innsang pawlin tuahmawh an tong asilen nan luat lo ding tin a hringhro. Amah cu hmun dangah aum zo” a ti.

Be the first to comment

Leave a Reply

Your email address will not be published.


*