Putin In Mithat Hmang Pawl A Ruai, Ukraine President Thah A Fial

Russia pawlin awlsamten Ukraine ram hi lak an tum nan an zum vekin thil a feh lo, an doawknak ah Russia ralkap tam zet an thi zo. Russia ralkap 5,300 an thi zo ih ralkap 200 kaih an tong. NATO pawlin minung thazang in Ukraine ram hi an bawm lo nan a thupten ralthuam, meithal ṭhaṭha an pe tin Putin cu a thinheng tuk.

Tu’ahcun mithat hmang pawlkom ‘The Wagner Group‘ cu Ukraine president le a kuthnuai ralbawi pawl that dingin a fial tin Daily Mail thuthang sungah an tarlang. An that dingmi hmin list 23 aum ih Ukraine prime minister khal a tel.

The Wagner Group pawlkom ah misual turu buru 400 an um ih zangfah lainatnak neilo hlir an si. Africa, Middle East, Syria, Libya le Mozambique ram pawl ah tualthat dingin an tlawng ṭheu. An hnaṭuan cu mithat hi a si, awlsamten mi an that hngal dah lo ih nasa zetin an hrem ciamco hnuah an lu an sat tan ṭheu.

Mi an hrem lai cu video in an zuk ih midang hringhronak ah an hmang ṭheu. Cutik lai ah Ukraine president khalin misual thawngtla pawl cu a suah zalen tum ih an ram Ukraine kilhim dingin a fial tum. Ukraine president in, “Kan rampi kan kilhim a ṭul, ziangvek dinhmun khalin kan kilhim ding. Thawngtla, doawk dan hmuhton mi nei zo pawl cu kan suah zalen dingih Russia ralkap pawl an do ve ding” a ti.

Be the first to comment

Leave a Reply

Your email address will not be published.


*