Pyu Saw Htee Hruaitu In Phun 2 Kailai Nauhak A Pawngsual Tum

Sagaing, Kanbalu Township, Nat Inn khua ah ralhrang kuthnuai ih cangvai Pyu Saw Htee hruaitu pakhat in tualsung nunau nauhak kum 8 mi cu a pawngsual tum. Nat Inn khua cu ralhrang lamtang pawl umkhawmnak khua a si.

Ralhrang le Pyu Saw Htee pawlin tlawnginn cu an kil thepthep ih nauhak pawl tlawng an kai. Kan dung June 6, 2022 sun ah Pyu Saw Htee hruaitu kum 53 mi U Shwe Ba in phun 2 kailai nauhak cu minung umlonak class room sungah a hruailut ih a puahcok. A sualpi man hlanah ralkap pawlin an va hmu.

Tualsung mi pakhat in, “Pyu Saw Htee hruaitu in nauhak a hmuhsuam. Nauhak cu an makpa ih tunu a si, kum 8 mi a si ih phun 2 a kailai. Tlawnginn class room pakhat ah a hruai ih a puahcok, a sualpi ngah lo. Tlawnginn ih um ralkap pawlin an va hmu man ih nauhak te cu bawngbi khal arak hruh lo, taklawng in a tlansuak” a ti.

Nauhak ih innsang pawlin taza an cuai tum nan ralhrang le Pyu Saw Htee pawlin tazacuai lo dingin an hringhro ih zangnadawmnak ah ting 30 an pe. Thuhla theitu in, “Thubuai tuah an tum ih zangnadawmnak ah ting 30 an pe. Pyu Saw Htee hruaitu a si ruangah thubuai an tuah ngamsal lo ih daiten an um. Ramsung a buai vekin khuitawk ah taza an cuai ding ti khal an thei lo” a ti.

U Shwe Ba cu nupi nei lai a si ih fate 3 anei. Khuasung mipi pawl hmuh laiah ralhrang pawlin an vuak hnuah a suahsemnak Koemyo khua ah an dawitlan. Koemyo khua khal ralhrang lamtang pawl umkhawmnak khua a si.

Ting 30 in remawknak an tuah nan Pyu Saw Htee pawlin ting 9 an laksak ih ting 21 lawng tuahmawh tong innsang hnenah an pe ih an lungawi lo zet. Nat Inn khua tlawnginn ah nauhak pawl tlawng an kai rero lai. Ramsung a buai hnuah ralhrang pawlin nunau tam zet an pawngsual zo nan thubuai tuahsak an si lo, thuṭhentu khal an um lo.

Taungtha khua ih um fala kum 21 mi, thinlung kimlo khal April 5 ah ralkap pakhat in a sualpi nan thubuai tuahsak a si lo, ralkap cu hmun dangah an thawnter. Noverber 2021 khalah cawkhal lai puvah cu ralkap 4 in an tuahmawh, a pu cu an vel ciamco ih a tunu cu an sualpi. San-U khua ih nuhmei fanu kum 30 mi khal February thla ahkhan Pyu Saw Htee hruaitu in a pawngsual nan tuini tiang thubuai tuahsak an si lo.