Rakhine Fala A Hnaṭuannak Ah A Kutzung 4 A Tan, Company In Ting 10 An Pe Tum Ih An Cohlang Lo

Rakhine, Baungdut khua ih um fala kum 23 mi Ma U May Win cu Yangon, Shwepyithar Township ih Fukuyama Garment Factory ah hnaṭuan in aum. March 30 sun ih an hnaṭuan laiah an hotu in a hnaṭuanmi si lo, midang hnaṭua bawm dingin a fial.

Cutin, a ṭuandan mi siloin hna a ṭuan rero laiah a cangsual, cet in a kutzung a ei ngah ih hliamhma nazet a tuar. Insein KBC Hospital ah an tlanpi hngal ih a hliamhma a bese tuk ruangah a vorhlam kutzung 4 cu an tansak.

Cumi hnuah hnaṭuan thei nawn loin an khua lamah a tlung, an company in ting 10 an pe tum nan a nulepa in an rak cohlang lo. Ma U May Win cu an innsang cawmtu a si ih a kutzung 4 a bul ruangah hna a ṭuan thei nawn lo ding.

Hringtu a pa in “Kum 2 lenglo a hnaṭuannak a si, kan buai zet phah. Zangnadawmnak cu in pek tengten a ṭul, mani ah cetzung manager in in phone ih ting 10 in pe tum nan, cumi cu kan cohlang lo” a ti.

Ma U May Win in “Zangnadawmnak zianghman kan ngah hrih lo, cetzung lamin na dam ṭha asilen hna na ṭuan theisal in ti nan hna ka ṭuan thei nawn lo ding. Ka vorhlam kutzung a si bet ih hna ka ṭuan thei nawn lo ding” a ti.

Myanmar daanhrampi ah hnaṭuan lai caan ah an cangsual ih piangsualnak a thleng asilen company in zangnadawmnak le thilṭulmi pawl an zoh thluh ding timi daan aum. Rakhine National Network le Western News in bawm dingin an company cu an pehtlaih tum rero lai.

Be the first to comment

Leave a Reply

Your email address will not be published.


*