Rakhine Ramri Police 100 Hrawng In Covid-19 An Kai, Ṭhenkhat Nulepa In An Fale Tlawng An Thlah Ngam Nawn Lo

Myanmar ralkap pawlin June 1, 2021 ihsin rampum huap nauhak pawl tlawng an kaiter. State tam sawn ahcun nauhak tlawngkai an um lemlo, asinan Rakhine ramsung ahcun nauhak pawl tlawng an kai hluahhlo.

An ram fimthiamnak hotu Dr. Tun Tun Thein in “Tlawng ong ni June 1 ah nauhak tlawngkai 358,931 zat an um, 100% percent zikte tlawng an kai” a ti. Covid-19 thlisia a hrangsal ruangah Covid-19 lak ih tlanlen dan ding daan le dun tuah in nauhak pawl cu tlawng an kai.

Myebon khua ih middle-school zirhtu in, “Tlawngta pawlin Covid-19 daan le dun khal an thlun tuk lo. Tulai boruak a hlum tuk ruangah tlawngta le zirhtu pawlin mask khal kan bun lo. Mipi in Covid-19 an ṭih lo ih ziangah an siar lo a si bik” a ti.

Asinan Covid-19 in Rakhine ram khal a nuai rero thlang ruangah ṭhenkhat nulepa in an fale cu tlawng an thlah ngam nawn lo, Rakhine-Bangladesh ramri Maungdaw khua ah Covid-19 natnei an pung deuhdeuh.

Covid-19 cu Bangladesh ram ihsin lut si an zum, July 1 sunah Rakhine-Bangladesh ramri ih police 96 in Covid-19 an kai ti an hmusuak. Border Guard Police Battalion 5 ih police pawl an si ih anmah thawn pehtlaih awtu khal quarantine in an khum.

Maungdaw Hospital, Dr. Nu Cathie San in “An zaten an dinhmun cu a ṭha, an damlonak cu thilrim an thei lo. A dang damlonak cu an nei lo” a ti. Rakhine ramsung ah mask bun lo ih vaksuak an tamtuk ruangah July 1 ihsin mask bun lo pawl cu cawhkuanter an si ding tin ṭuanvo neitu pawlin an phuang.

Be the first to comment

Leave a Reply

Your email address will not be published.


*