Ralbawi In A Naupa A That

Bago peng, Taikgyi khawpi ih um unau hnih cu sulkhat suak an si nan an duhmi a bangaw lo. Upa sawn cu ralkap hotu a si ih a nau cu mipi lam ralkap a si. A nau ih hmin cu Ko Soe Moe Hlaing (kum 55) a si ih nupi nei in fate 3 an nei zo.

Ralkap cozah dodal zettu a si ih miharsa pawl khal a bawm ringring. Ko Soe Moe Hlaing cu ramkhel hminthang pakhat a si ih 88 kum khalah nasa zetin arak cangvai zo, Burma Students’ Democratic Front (ABSDF) ralkap ah arak lut ih thuneihnak latu ralkap pawl a do.

Cumi hnuah nupi fanau nei in Bago khawpi ah an um. Aung San Suu Kyi in Nobel Peace Prize a ngah ṭum khalah Ko Soe Moe Hlaing cu ralkap pawlin an kai. December 10, 1991 ah Suu Kyi dinpinak ah tin lamzawhnak an nei ih ralkap pawlin an kai.

Kum 15 sung thawng an thlak hnu 2016 kum ah Insein thawnginn ihsin a suak. Cutin tuikum 2021 rambuainak ah a tel vivo thotho. A u Lt. Gen. Than Hlaing cu ralbawi pi a si ih February 2, 2021 ah Deputy Minister of Home Affairs le Chief of Police sinak an pe bet.

Than Hlaing cu ralbawi misual hminthang zet a si ih a kuthnuai ralkap pawl hnenah a ramsung ih daiten lamzawhtu pawl cu meithal in a kapter. A kutsung ah sualnak nei lo mi tampi an thi zo, an unau ih mizia a bangawk lo ruangah an buai ṭheu.

Ṭumkhat khal Ko Soe Moe Hlaing in “Ka u thawn ramkhel thuhla ah kan dinnak a bangawk lo ruangah ka u in ka lo that ding’ in ti tin hni phah in a rualpi pawl hnenah a sim. May 22 ah an kai ih May 24 ah a thi tin a nupi hnenah an sim, a ruang cu a innsang pawlin an la zo.

Hringtu an pa cu sibawi hminthang Dr. Sein Hlaing a si, an nulepa in an dampi nawn lo. USA ram ih um hlanlai Myanmar ramkhel Tun Tun in “Nu pakhat ih hringsuahmi ihsin pakhat cu mipi ralkap, pakhat cu uico ralkap a ṭuan. Unau hnih ih thinlung cu a dang veve, ramkhel thuhla ruangah a u in a nau a that ti cu a riahsiat um tuk” tin a facebook cahmai ah a tarlang.

Be the first to comment

Leave a Reply

Your email address will not be published.


*