Ralbawi Pawl Ih Sawmnak Cohlangtu Yan Aung In “An Kaihmi Lemcan Thiam Kan Unau Pawl Hrangah Ralbawi Ka Va Tong” A Ti

Myanmar ramsung buainak ah ralkap pawl milar hminthang pawl hi an ruat thupi zet. Milar hminthang pawl cu mino, mipi thinlung hruai theitu pakhat ah an ruat ruangah milar hminthang pawl cu kai dingin an hawl vivo. Lu Min, Eaindra Kyaw Zin, Pyay Ti Oo le Paing Takhon pawl khal an kai lai ih thawngtla pawl an suah zalen tik khalah an tel dah lo.

October 31, 2021 ah Min Aung Hlaing in milar hminthang pawl cu Yangon ah tongaw dingin a sawm. Cutawk ah Myanmar lemcan thiam hminthang, hranghlun Yan Aung (kum 54) khal a telve. Milar ṭhenkhat khal an tel, ralkap pawlin milar hminthang pawl hnenah sumpai 4000, fangdip 100, siti 500 le pee 300 an rak pe.

Myanmar ramsung buainak ah Yan Aung cu arak dai reprep nan Min Aung Hlaing ih sawmnak cohlang in ava tong ruangah mipi in an soisel ciamco. Cutikah Yan Aung in simfiang awknak anei, “Ralbawi pawlin tongaw dingin in sawm ih caan reipi sung ka ruataw.

Lemcan thiam thawngtla ka unau pawl hrangah ausuah theinak caanṭha ka neih pang ah tin ralkap puainak hmun ah ka va tel. Thildang zianghman beisei mi ka nei lo, lemcan thiam thawngtla ka unau pawl hrangah ruatsannak aum ding timi lungput lawngin ka tel” a ti.

Ralkap puainak hmun ahcun thurelnak caanṭha anei ngai ih thawngtla lemcan thiam pawl hrangih a ausuak thu khal a rel. “Lemcan thiam thawngtla ka unau pawl ih thuhla hi ruatṭha sal dingin ka thehlut. Himi thuhla pakhat lawngah puainak hmun ah ka feh tin ka lo tiamkam, ka unau pawl hrangih ka ausuak thei ruangah tu’ahcun ka hnangam tuk zo ih kan duhthusam vekin kim hram seh” a ti.

Be the first to comment

Leave a Reply

Your email address will not be published.


*