Ralhrang Hlasak Zuamawknak Ah Chin Le Kachin Aiawh Ih Teltu An Um

Ralhrang pawlin Music Festival tin hlasak zuamawknak an tuah ih zan nazi 9:00 ah MRTV fehtlang in hlasak zuamawknak lai cu an pholang. November 26, 2021 ihsin hlasak zuamawknak hi an thok ih February 11, 2022 tiang an nei ding.

Himi an hlasak zuamawknak cu February 12 sun ih an tuah ding mi avei 75-nak Union Day hrangah a si. Hlasak zuamawknak ah a pakhatnak ngahtu cu ting 100, pahnihnak cu ting 60 le pathumnak cu ting 40 tin laksawng an pe tum.

Myanmar ramsung ih ramkulh/ramṭhen 15 ihsin ramkulh pakhat ah mi 3 ciar an poksuak ih minung 45 in hlasak zuamawknak an nei. An zuamawknak ahhin zuam awtu pawl ih hminpum cu an tarlang duh lo ih an hmintawi lawng an pholang sak.

Chin ram aiawh ih zuamawtu pahnih cu Rebecca le Nan Sui tin an tarlang ih an thuhla cipciar cu theih a si hrih lo. Chinmi ngai an si le si lo cu theih a si lo. Kachin ramsung ihsin mi pathum an tel ih an hmin cu AGyon, Arin le N Lun Lun pawl an si. Kachin mipi pawlin zo an si ti an rak zingzoi hngal ih AGyon cu milar pakhat a si ruangah an soisel ciamco.

AGyon ih hminngai cu Hka Tsaw Wawn Tsaw a si ih 2021 kum ah Kachin ramsung hlasak zuamawknak ah arak tel zo. Cun ralhrang in thuneihnak an lak hnuah mibawmtu pawlkom pakhat ah an hotu a si ih ralhrang pawl ih tuahmi hlasak zuamawknak ah ava telve cu mipi in an soisel zet.

MRTV in thu an sutnak ah AGyon in, “Ka pate ruangah a si, hlasak zuamawknak picang zet aum ding, na tel kem? tin in ra sut ih hlasak lam hi ka paih zet ruangah ka tel” a ti. Tualsung mi pakhat in, “Hlasak thiam pawl hi an pumcawm awknak hrangah hla an sak ṭheu cu ka theithiam, asinan tulai kan dinhmun ah mipi pawl harsatnak pe rerotu ralhrang kuthnuai ah hla ava sak ih zuamawknak ah a telve hi cu a diklo, a tel ding hi a si lo nan” a ti.

Be the first to comment

Leave a Reply

Your email address will not be published.


*