Ralhrang Ihsin Tlansuak Ṭhenkhat Cu Suamhmang Ah An Cang

Ralhrang kutsung ihsin tlansuak ralkap ṭhenkhat cu hmunhimnak lamah an tlan ṭheu, mipi ralkap hnenah an tlanlut. Asinan, ṭhenkhat cu suamhmang ah an cang. Kachin State, Putao – Myitkyina lamzin parah suamhmang pawl an hrang zet, meithal kimcang in an nei thluh ih lamzin ih feh pawl cu sumpai an rak dil. Kut an thlak ih an hringhro ṭheu.

Khuami pakhat in, “Meithal thawn an tin ih sumpai an dil, kut an thlak ruangah khualtlawng pawl khal hliamhma nasa zet an tuar. Zohman ṭong an siang lo, kamkhat an ṭongsuak asilen an hmai ah an beng fukfi. Motor ihsin an tumter thluh an ding tlarter hnuah sumpai an dil, meithal thawn khal an sawh/vuak.

Kum 45 mi khal hliamhma nasa zet a tuar, motor 40 hrawng hnenah sumpai an rak dil zo. Khualtlawng pakhat hnenah Ks. 10,000 an dil. Minung 5 an si ih pakhat cu ralkap kawr a hruh, zo pawlkom hnen khalah an um lo ih anmahten pawlkom vekin an um” a ti.

Minung 3 cu ralhrang hnen ihsin tlansuak an si ih arsi pahnih ben ralkap, arsi pakhat ben ralkap le ralkap menmen pakhat an si. An tlansuah laiah meithal kimcang thawn an tlansuak ih cerek 200 ciar hrawng an nei. Khuadang dangah an vak kual ṭheu ih khuasung mipi pawl hnenah sumpai, ei le in ding an dil ṭheu. Khuasung mipi pawlin ralhrang sakhan ah an va theihter nan an rak ngaihsak lo.

Tualsung mi pakhat in, “An tlansuah zan ah pastor hlun tei inn ah an va lut ih meithal thawn an hringhro. Sumpai, ei le in pawl an laksak. Khua dangdang ah an feh ih sumpai an dil vivo, sumpai pe lo pawl cu meithal thawn an hringhro. Lamzin ah khualtlawng pawl sumpai an rak dil ṭheu ruangah tulai hi motor khal an tlan ngam tuk nawn lo” ti.

Be the first to comment

Leave a Reply

Your email address will not be published.


*