Ralhrang In A Fale 3 An Thahsak, Sunghno Nui Thinlai A Kuai

Sagaing, Nyaung Pin Wun khua ih um unau 3 cu ralhrang pawlin an that ih hringtu nu cu umngaihnak thei loin a ṭap ciamco, zohman in an hnem thei lo.

An khua kiangih um palik sakhan cu tualsung mipi kilhimtu pawlin an va kap ciamco ruangah ralhrang pawlin an kiangkap ih um khua pawl cu an nuai ih khuasung mipi pawl an that, ṭhenkhat cu an urthat.

February 3, 2022 sun nazi 12:00 hrawngah Nyaung Pin Wun khuami unau 3 cu ralhrang pawlin lamzin khihhmuhtu dingah an kai ih an hruai hnuah Madhura khuami pakhat telin minung 4 cu an kap that.

Tualsung mi pakhat in, “An unau 3 in ralhrang pawlin an that, an nauhak bik cu phun 8 kailai a si. Himi sun ah ramlak ah an va feh ih ralhrang pawl thawn an tongaw, ralhrang pawlin an kai ih Madhura khua kiangah an kap that. An ruak cu tuizing ah kan va la ih Nyaung Pin Wun thlanmual ah kan vuiliam” a ti.

An thahmi unau thum cu Kyaw Min Tun (kum 26), Ko Kyaw Tu Aung (kum 24) le kum 17 mi Ko Kyaw Min Naing pawl an si, Madhura khuami U Myint Kyaw ih fapa Ko Zaw Myo Aung (kum 20) khal an kap that.

Be the first to comment

Leave a Reply

Your email address will not be published.


*