Ralhrang In An Inn An Lonsak Ruangah A Riahsia Tuk Ih A Thi, A Ruak Khal Lamzin Kap Ah Vuinak Caanserh An Hmang

Bago, Taungoo khua ih um pitar pakhat cu ralhrang pawlin an inn le lo an lonsak ruangah a tuar naa tuk ih a thih phah. Himi inn ah kum reipi sung an rak um zo. An makpa U Moe Ma Kha cu Taungoo ramsung ih NLD palai a si, ralhrang in ramsung thuneihnak an lak veten kaih an tum ruangah hmun dangah a tlan.

Ralhrang pawlin U Moe Ma Kha an kaih ngah lo ruangah February 12, 2022 ah a pilepu tei inn pahnih le hnipuan thitnak dawr cu an kharsak. An inn hmaiah ‘rampi siatsuahtu pawl thawn an pehtlaihawk ruangah himi inn cu cozah ta a si’ tin capi an tar.

An thilri bungrua zianghman an la man lo ih sumpai malte lawng an la, ralhrang pawlin an inn cu an kalhsak. Umnak ding inn an neih nawn lo ruangah innsang nubik Daw Khin Win cu a thinhar tuk, amah hi zunthlum nat a neicia nan a natnak cu a bese tuk lo.

Ralhrang in an inn an lonsak hnu ihsin thinhar mangbang in a damlo, siizung ah an va tuamhawm nan áš­hahlam pan thei nawn loin February 20 ah a thi. February 22 ah an vuiliam, Daw Khin Win ih ruak cu an innkiang hmun lawngah vuinak caanserh hmang dingin an va dil nan an rak siang lo.

Himi inn le a hmunram pawl cu kharhkhummi a si ruangah a ngah lo an rak ti. ‘Asilen, lamzin kap ah vuinak caanserh kan hmang ding’ an tiih vengsung mipi pawlin an siang ahcun a ngah’ an ti. Vengsung mipi pawlin an rak siang ih an bawm sawn.

An hawlmi U Moe Ma Kha in, “Kei thawn pehtlaihawknak zianghman an nei lo, ka inn le lo khal a si lo nan an kalh thotho. An va kalh laiah ka pi le pu, ka nupi le ka fanu 2 an rak um. Harsatnak an ton laiah an kiangnai ah ka um thei lo cu ka seherh tuk” a ti.

Be the first to comment

Leave a Reply

Your email address will not be published.


*