Ralhrang In CDM Tuah Sayama Telin Nunau 30 Cu A Burpin An Sualpi

Sagaing, Mingin Township, Ben le Utne Bok khua cu ralhrang pawlin an nuai ciamco. February thla sungah an nuai ciamco ih inn pawl khal an urkang, an rannung vulhmi uico, caw, ar pawl khal an thahsak ih an ei. An kaihmi CDM tuah tlawng sayama telin nunau 30 cu ralhrang pawlin a burpin an sualpit.

An khua ah internet le phone line pawl an phitsak thluh, an tuahmawhmi nunau pawlin an thuhla cu an relsuak ngam lo ih sahimnak hawlin ramlakah an tlan.

Tualsung mi pakhat in, “An ningzak ruangah an relsuak ngam lo. Khuami pawl khalin an relsuak ngam lo ih daiten an um, an nunnak hrangah a ṭihnung ding an zum ruangah an relsuak ngam lo ih ramlak ah an tlan. An parih thilthleng cu an relsuak asilen ralhrang pawlin an khua an siimsal dingih an that ding ti an phang” a ti.

Mingin ramsung, Tin Taw khua khalah innsang pabik cu ralhrang pawlin an kai ih a nupi le a fanu kumkim hrih lo cu an sualpi. Annih khal an sahimnak hrangah an thuhla a cipciar cun an tarlang lo.

Ralhrang Pawlin Mingin Ah Nunau 3 An Pawngsual Ih An That: Sagaing, Mingin khua ih umhmun khuar ralhrang pawlin tualsung nunau 3 an pawngsual ih an that thu April 5 ah People Defence Force Taung Dwin Region-Mingin in an phuang. March 28 ah ralhrang pawlin nunau pathum an kaihrem ih an sualpi, cumi hnuah an that. Pakhat cu kum 16 mi, kum 14 mi le kum 35 mi an si.

Ṭuanvo neitu in, “Kan theih pekte ahcun anmahten an thataw tin kan thei, kan zingzoi hnuah uico pawl ih thahmi ti kan theisal” a ti. Ralhrang pawlin khuasung caw le naa pawl an ruksak ih Kalewa lamah an zuarsuak ṭheu.

April 3 khalah ralhrang pawlin Htone Gyi khua an va nuai ciamco ih raltlan thlam 12 an urkang, raltlan pawl cu an kai ih nasa zetin an hrem ciamco. April 4 sun khalah Gangaw-Kalay lamzin kap ih um Thaehlaw khua cu ralhrang pawlin an nuai ih pacang le a fanu an kai. Pacang kum 50 mi cu a dunglam ah a kut an tawnbet ih an velh ciamconak ah a thi, a thih hnuah a fanu kum 16 mi cu an sualpi ih an that. Ralhrang pawlin pafa ruak cu an urkang tin YPDF in an phuang.

Be the first to comment

Leave a Reply

Your email address will not be published.


*