Ralhrang In Chin Pacang An Kai Ih A Innsang Hnenah Ting 10 In Tlensuak Dingin An Fial, An Tlensuak Lohli Thei Lo Ruangah An That

India-Myanmar ramri Tamu khua ah ralhrang pawlin Chin pacang Ko Kein Pu (ကိုကိန်းပူ) cu August 13, 2022 ah san um loin an kai. A innsang pawl hnenah ting 10 in ra tlen uh’ an ti.

A innsang pawlin sumpai an neih lo ruangah a caan kel in an va tlensuak thei lo ruangah ralhrang pawlin an soisat ciamco ih a nunnak liam. Siizung ah a ruak an ret ih a innsang pawl hnenah a ruak la uh’ an ti. A innsang pawlin a ruak an va la ih August 14 sun ah an vuiliam.

An sungkhat in, “An thatmi hi ka rualpa a si ih kum 33 mi Ko Kein Pu a si, thilri bungrua la dingin a feh lam August 13 sun ah an kai. Ralhrang pawlin a innsang hnenah ting 10 in ra tlensuak uh’ an ti, sumpai an neih lo ruangah an sim tikcu caan ah an va tlensuak thei lo ih an that.

Ko Kein Pu in a nu, a nupi le a fapa pakhat a thihsan. Tamu ah ralhrang le Pyusawhti misual pawl an cangvai nasa tuk. Sumpai nei deuh inn ah an lut ih an hringhro, an thilri bungrua pawl an laksak ṭheu” a ti.

Be the first to comment

Leave a Reply

Your email address will not be published.


*