Ralhrang In Nweinn Khua Ih Fala Pawl An Sualpi

Sagaing ramṭhen, Pale peng, Nweinn khua ih um fala / nunau ṭhenkhat cu ralhrang pawlin an sualpi ṭheu tin kiangkap ih um khua mipi pawlin media hnenah an sim thei. Nweinn khua cu hlanlai ralbawipi Bohmu Gyoke Kyaw San ih suahsemnak khua a si ih a sungkhat pawl khal an um lai.

Ralhrang pawlin tualsung mipi kilhimtu an hawlnak ah himi khua sungah umhmun an khuar, helicopter in ralhrang pawl cu an thiar thluh lawk nan January 19, 2022 sun ah hilocpter in an va thlahsal ih an khuasung ih um Pyu Saw Htee minung 20 hrawng cu doawkdan an zirh rero lai.

Tualsung mi pakhat in, “Nweinn khuasung ah ralhrang pawl umhmun an khuar ih nunau pawl an pawngsual. Fala pawl cu an ningzak ruangah an relsuak ngam lo, Nweinn khua cu ralbawi hlun Bohmu Gyoke Kyaw San ih khua a si ih a sungkhat pawl khal an um lai.

An khua ah ralhrang pawl an va lut ih tlansuak lo, ihkhun hnuai ih relh fala pawl cu an kai. Zingzoinak an tuah ih an hnipuan pawl an phelhter thluh hnuah duhtawk in an sualpi thu kiangkiang ih um khua mipi pawlin an rel.

An khua kiang Ohnhnauk khalah hi thil a thleng ve nan fala pawlin an relsuak ngam lo, tuar thei nawn lo fala ṭhenkhat in tuhnui lawngah an relsuak. An khua kiangkap ih um ralhrang lamtang pawl khal an thinheng tuk ih mipi lam an tang phah, a hring ihsin a sen ah an lut” a ti.

Nweinn khua kiangkap hrawng ah tualsung mipi kilhimtu le ralhrang pawl hi an doaw ṭheu ih ralhrang pawlin doawknak helicopter an hmang. Mipi inn le lo an siatsuah ih inn an urkang, sualnak nei lo khuasung mipi pawl an that. An kaihmi ṭhenkhat cu ralkham awknak ah an hmang ih an hruai vivo.

Be the first to comment

Leave a Reply

Your email address will not be published.


*