Ralhrang In PDF-Kalay (4) Sakhan An La Ih An Urkang, Ting 500 Lenglo Man An Sung

Ralhrang pawlin People’s Defence Force Kalay – Battalion 04 sakhan cu May 14, 2022 zinglam nazi 10:00 hrawngah an nuai ciamco. Doawknak vanzam Fighter Jet pathum in bomb an thlak, doawknak helicopter MI 35 pahnih in minute 30 sung hrawng an kap, drone an hmangih bomb an thlak.

Cumi hnuah ralhrang 200 hrawngin sakhan cu an lutchilh. PDF-Kalay in an rak kap ih minute 15 sung hrawng an kahawk hnuah meithal, ralthuam hmanmi a thlauawk tuk ruangah mipi ralkap pawl cu dung an sip.

An doawknak ah ralhrang thi an um ding ti zum aum. Mipi ralkap lamah mithi an um lo, hliamtuar cu an um nan seherh um dinhmun an si lo. Ralhrang pawlin sakhan cu an urkang.

Furcaan hrangih ei le in ding an ret ṭhami, raltlan nauhak pawl hrangih an onmi tlawnginn le siikhan pawl khal an siatsuah ih an urkang. Sakhan thar tundin salnak dingah mipi bawmnak an ṭul thu an tarlang.

Be the first to comment

Leave a Reply

Your email address will not be published.


*