Ralhrang In Pitar Kum 62 Mi A Pawngsual Hnuah An Pule In “Kan Naule Pawl Hi Titsa Nei Ve An Si Ih An Supaw Ve Thei Lo” Tin Ngaithiam An Dil

November 7, 2021 ah ralhrang pakhat in pitar kum 62 mi cu an hmuan sungah a pawngsual. Shan State, Kutkai Township, Namphalon khua ih thilthleng a si. Mi pawngsualtu ralhrang cu Min Min Soe timi a si ih Battalion 336 ih ralkap ṭuan lai a si.

November 11 sun ah an pule pawlin thilthleng ngai a si thu an phuangaw ih sual tuahtu khal ralkap daan le dun vekin napin hremnak an pe ding thu an phuang. Sual tuahtu Min Min Soe cu an kai zo tin an sim thei.

Tualsung ralkap ṭuanvo neitu pawlin an va leng ih, “Kan naule pawl hi titsa nei, thisen le taksa nei ve an si ih an supaw ve thei lo ruangah hi thil a thleng” tin ngaithiam an dil hnuah siivai an pe. Tlunlam ihsin ralbawi pawlin zangnadawmnak ah ting 10 an pe thu pitar tuamhlawmtu Daw Lwan Reh in media hnenah a sim thei.

Daw Lwan Reh in, “Kan umnak ah pitar pawngsual thuhla hi kan rak thei dah lo, aum dah lo. Hi thil a thleng ngaingai ruangah nunau pawl cu kan thlatem tuk, ka pi hi tutiang rawl a ei thiṭha thei hrih lo. An velhnak ah a hmai a thling thluh, a kaa khal a thling ih rawl a ei thiṭha thei hrih lo.

Hmuan sungah amahten aum ih kan umpi ringring thei fawn lo, a thilton rapthlak zet ruangah amahten aum ngam nawn lo. A caan len ka ningzak tuk aw tin a ṭap ciamco, ahlan ihsin damcak lo a si ih tu’ahcun a thinlung le a taksa khal a buai. Mithar a hmuh asilen a ṭih tuk, midang khal a ṭih thluh. A harhdamnak hi kan seherh tuk, ralhrang pawl kiangah nunau pawl kan him nawn lo. Kan dung khalah phungyi nunau (metila) tleirawlte cu ralhrang pawlin an rak pawngsual zo” a ti.

Women’s League (Myanmar) WLB pawlkom in kum 70 sung ralhrang pawlin tlangpar nunau pawl an rak pawngsual zo, khuasung nunau pawngsual cu doawknak ciikhat ah an hmang. Himi pawngsual thubuai cu ramsung ah cinfeltu ding an um lo ruangah leitlun huap thuṭhennak zung ah kan thlen ding an ti.

Be the first to comment

Leave a Reply

Your email address will not be published.


*