Ralhrang Kutsung Thleng Aiin Bomb In Ralhrang 15 A Thihcilh

Magway, Yezakyo Township, Theataw khua ah mipi ralkap PDF pakhat in bomb in ralhrang 15 a thihcilh. A innsang pawl humhimnak ah a zuk le hmin cu tarlang a si lo. Mual liamtu mino cu Yesagyo Revolution Group – YRG sungtel a si.

July 8, 2022 zanlam nazi 6:30 hrawngah an khua ah ava tlung ih lamlak ah ralhrang pawl thawn an tong aw. Ralhrang pawl cu Theataw khua ih phungyi tlawnginn ah umhmun an khuar, ralhrang pawl a hmuh veten cakpin a tlan ih meithal in an kap, amah cu an kap ngah lo nan a bike an kap ngah ih a tlu.

Ralhrang pawlin an va kai tum ih bomb pathum in arak thihcilh. A hmun ah ralhrang 7 an thi hngal ih siizung ah ralhrang 8 an va thi. Yesagyo Revolution Group – YRG pawlin miralṭha tin upatnak an hlan.

Ṭuanvo neitu in, “Mino hi thilri bungrua pawl phurtu a si, khuasung ah a cangvai ṭheu. Himi zinglam ah ralhrang pawl thawn kan kap aw ti arak thei lo, Theataw khua ah ralhrang pawl umhmun an khuar ti khal a thei lo.

Zanlam ah a tlung ih Theataw khua ah ralhrang pawl thawn an tong aw. Kan naupa in ‘uico ralkap kutsung ih um a duh lo. Thusutnak hmunpi ih thleng ka duh lo. An thi kei, ka thi ve sawn ding’ arak ti ṭheu. Bomb pathum in ralhrang 15 a thihcilh” a ti.

Be the first to comment

Leave a Reply

Your email address will not be published.


*