Ralhrang Lamtang Pawlin Mino 2 An Kap That

Sagaing Division, Shwebo Township, Myin Sii khua ih um mino pahnih cu ralhrang lamtang Pyu Saw Htee pawlin an kap that. December 11, 2021 zan nazi 8:00 hrawngah Maung Moe Kaung le Maung Raza Min Tun cu bike thawn an phuraw ih an tlung, lamlak ah an khua lal U Htay Aung le Pyu Saw Htee pawlin an rak dingter ih an ding lo ruangah tin an kap ciamco hngal ih a hmun ah an thi.

Tualsung mi pakhat in, “San le vang um loin an kap that, mino pahnih cu bike thawn inn lamah an tlung ih an ding lo ruangah tin an kap that men” a ti. Maung Moe Kaung cu kum 17 mi a si ih Maung Raza Min Tun cu kum 21 mi a si. U Htay Aung le Pyu Saw Htee pawlin an khua ah zan nazi 7:00 ihsin zohman nan vaksuak lo ding tin thu an rak phuang zo.

“Zan nazi 7:00 ihsin vahsuah an siang lo, zan nazi 8:00 hrawngah bike mawng lai mino 2 cu an kap that. Zan an duty lai thawn an tongaw ih an rak kap that” tin thuhla theitu pakhat in media hnenah a sim thei.

Mithi ruak pahnih cu a zan nazi 1:00 hrawngah siizung ah an phur ih Maung Moe Kaung cu a lu ah an kap ngah, Maung Raza Min Tun khal a hngawng ah an kahnak hliamhma hmuh a si. U Htay Aung le Pyu Saw Htee pawl cu zantinten zu an in ih khuasung mipi pawl an hringhro áš­heu ih meithal khal an hmetpuak ringring.

Be the first to comment

Leave a Reply

Your email address will not be published.


*