Ralhrang Pawl Ih An Hremnak Hliamhma Ruangah A Thi

Bago Region, Waw khawpi, Chan Mya TharSi vengsung ih um mino kum 25 mi cu ralhrang pawlin an kai ih an hrem natsat tuk ruangah a hliamhma pawl tuar loin mual a liam. Tlangval Sai Mon Zaw cu rampi zalennak ngah dingin cangvaitu pakhat a si, lamzawh duhphorhnak khalah a tel ṭheu.

April 18 ah ralhrang pawlin an kai, thusutnak hmunpi ah nasa zetin an hrem, an vaw ciamco. November 19 ah ralhrang pawlin an suah zalen nan hliamhma nasa zet a tuar ruangah a innsang pawlin siizung ah an tlanpi. Cutin siizung an thlen hnuah ṭhalam a pan thei cuang lo ih November 30 zingpit nazi 4:00 hrawngah a hnukcat thu theih a si.

A rualpa in, “Ralhrang pawlin pukmah 505 in thubuai an orhter ih April 18 sun ah an kai, thusutnak hmunpi ah nasa zetin an hrem ciamco. A taksa sunglam khal a kekkuai, a thin khal a naa. Hepatitis B nei a si ih a suah veten siizung ah an tuamhlawm, tuizing nazi 4:00 ah mual in liamsan” a ti.

Cuvek thotho in Myingyan khua ih umhmun khuar ralhrang pawlin khuasung mi Ko Than Tun Aung (kum 25) cu an vaw that. November 29 simlam nazi 4:00 hrawngah ralhrang pawl cu zudawr sungah an va lut ciamco ih thilri bungrua pawl an siatsuah.

Zudawr neitu khal an kai, cun zu rak in lai mipa 8 khal nasa zetin an vuak ciamco hnuah an kai. Cumi lakah Ko Than Tun Aung cu an vaw that, a ruak khal bazar kiangah an hlon thu mithmutu pawlin an rel. {Zuk: Ralhrang pawl ih an hrem that mi Sai Mon Zaw}

Be the first to comment

Leave a Reply

Your email address will not be published.


*