Ralhrang Pawl Ruangah Raltlan Nufa An Thi

Shan State, Kutkai Township, Zup Awng raltlan camp cu ralhrang pawlin bomb in an kap ih raltlan nufa an thi. June 17 zinglam nazi 11:00 hrawngah ralhrang pawlin raltlan camp cu bomb in veithum an kap, himi sun ah doawknak zianghman aum lo nan ralhrang pawlin raltlan camp cu an kap hrim.

June 16 ah KIA le PDF tangtlang in Karlai khua kiangah ralhrang pawl an kap. A thaisun June 17 ahcun kahawknak aum nawn lo nan ralhrang pawlin raltlan camp cu bomb in an kap ih raltlan nufa an thi, hliamtuar pakhat aum.

Himi raltlan camp sungah mipi ralkap MNDAA pawl an rak um dah, thla reipi sung an um hnuah hmundang ah an thawn’aw. Raltlan nufa cu kum 56 mi Daw Naw Lai le a fanu tlawng sayama Daw Naw Naw (kum 28) an si ih June 18 zinglam nazi 11:00 ah an vuiliam.

Hliamtuar pakhat cu putar kum 82 mi U La Aung a si ih a hliamtuar a nasa tuk ruangah a dinhmun hi a ṭha lo. U La Aung cu a fanu in a cawm, a fanu cu lo hnaṭuan ih eihawl a si ih an harsa tuk. U La Aung tuamhlawmnak ah bawm an ṭul zet. Ralhrang pawl cu Karlai khua ah umhmun an khuar lawk, khuasung mi ṭhenkhat an kai ih lamzin khihhmuhtu ah an hruai hnuah an suahsal.

Be the first to comment

Leave a Reply

Your email address will not be published.


*