Taninthayi, Thayetchaung Township, Inbya khua ah ralhrang pawlin tualsung mi nunau pakhat cu a burpin an sualpi hnuah a thuhla an thei nawn lo, khuitawk hmun ah aum ti khal an thei lo.
Kum 40 mi nuthlawi cu May 26 sun ah an khuapawn ah caw rawl pe dingin ava feh ih cutawk ah ralhrang pawlin an kaihrem ih an sualpi thu tualsung mipi pawlin media hnenah an sim thei.
Khuami in, “Himi thil a thleng ni ah khawleng ah ralhrang 3 hrawng an duty, caw rawl a pek laiah ralhrang pawlin an kaihrem. Kiangkap ih um mithmutu in a ṭih tuk ruangah khuasung ah a tlanlut ih vengsung mipi pawl hnenah thilthleng cu a sim thei” a ti.
May 26 sun ah ralhrang pawl ih an kaihrem lai an hmu ih tuisun ni tiang a thuhla an thei nawn lo. Nunau kum 40 mi cu amahten khuasa a si, fa khal anei lo. A pasal in a thihsannak hi a rei zet zo.
Khuami pakhat in, “A inn khal a lawng, zohman an um lo. An sungkhat pawlin kiangkap khua khalah an va hawl nan an hmu lo. Tutiang a thuhla kan thei hrih lo” a ti. Tualsung mipi pawlin ‘ralhrang pawlin an sualpi hnuah an thup hlo a si ding ti an zum thu an rel.
Leave a Reply