Ralhrang Pawlin A Fapa An Thlai That, A Nu In, “Ka Fapa Ih Pekawknak Parah Ka Suang Tuk” A Ti

Ralhrang pawlin ramkhel ruangih an kaihmi 4 U Phyo Zayar Thaw, U Kyaw Minyu (Ko Jimmy), U Hlah Myo Aung le U Aung Thura Zaw cu Insein thawnginn sungah an that.

U Kyaw Minyu (Ko Jimmy) cu 88 kum ih tlawngta pawl hruaitu pakhat a si, U Phyo Zayar Thaw khal NLD palai hlun a si. Midang pahnih cu ramkhel thuhla ruangih an kaihmi an si ih thihdaan an orhter hnuah an thlai that.

An that ni le caan cu an phuang lo nan zingzoitu ṭhenkhat in July 23 sun ah an that thu an phuang, an that hlanah an innsang pawl thawn online fehtlang in an biakawkter. Asinan, an that ding thuhla cu an sim thei lo ih thuthang a darh hnu lawngah an rak thei.

U Phyo Zayar Thaw ih nu Dr. Daw Khin Win May in, “Ka fapa hi misual, rukru a si lo. Ram le miphun hrangih a nunnak a pek ruangah ka suang tuk. Ziangtik ni le caan ah an that ti cu kan thei lo.

July 25 sun ah Yangon Insein thawnginn ah a ruak kan va dil nan thawnginn kiltu pawlin in pe lo ding thu in sim. Ka fapa ih ruhro lawng khal kan ngah duh, ṭhaten kan vuiliam ding” a ti. Ralhrang pawlin ramsung a buai hnuah ramkhelh ruangih an kaihmi 113 cu thihdaan an orhter ih 4 cu an that zo.

Be the first to comment

Leave a Reply

Your email address will not be published.


*