Ralhrang pawlin Myanmar hlasakthiam le model hminthang Chan Chan tei inn an lonsak. Kum 35 mi Chan Chan ih hminngai cu Chan Mya Nyein a si. Myanmar Idol Season (1) ah thuṭhentu a si. July 17, 2013 ah pasal anei ih fanu pakhat an neih hnu 2017 ah an ṭhenaw fel.
Ralhrang in ramsung thuneihnak an lak hnuah Chan Chan cu ralhrang dodalnak ah a tel ṭheu, cozah hnaṭuantu pawl khal CDM tuah dingin a fial. Curuangah ralhrang pawlin April 2, 2021 ah 505 pukmah hmangin thubuai an orhter ih kaih an tum, Chan Chan cu hmunhimnak ah a tlan.
Ralhrang pawlin cozah dodaltu tin an inn cu an va kalhsak ih zuar an tum. May 1, 2022 ah Chan Chan in, “Kan ziangkim hlan in kan um laiah kan inn khal an zuar, thildiklo zet ih cangvaitu pawl hi thazang rak pe hlah uh. Ralhrang pawlin kan inn hi an kalh ringring hnu tu’ah an ongsal ih zuar an tum, zohman in lei hlah uh.
Dothlennak a cem hnuah kan neihmi thilri bungrua pawl hi kan la kirsal thluh ding, kan inn hi nan rak lei asilen nan sung ding. A caan a kim tikah kan inn hi kan lasal dingih tu’ah nan lei asilen sumpai nan sung thluh ding, innneihnak cahnah poimawh pawl khal kan hnenah aum thluh lai ih ralhrang kutsung ihsin zohman in lei hlah uh” tin a tarlang.
Leave a Reply