Ralhrang Pawlin Chin Mino (2) Cu ‘CDF Nan Si’ Tin An Kai

Kalay peng, Cikung khua check-gate ah May 30 sun nazi 2:00 hrawngah ralhrang pawlin zohdiknak an nei ih Chin mino (2) an kai.

An kaihmi Chin mino (2) cu ralhrang pawlin “CDF training ṭheh an si. Falam peng, Hrianghnang khuami Salai Lal Cung Mawi le Salai Rual Sang Cung an si” June 1 sun ah ralhrang thuthang Fifty Two News ah an tarlang.

Thudang: Ralhrang Hnenah PDF Sakhan Umnak Simtu Cu An Kap That
Mandalay peng, Madaya khua ih um Ko Kala in ralhrang hnenah PDF pawl umnak sakhan a sim ṭheu, a sim hnuah ralhrang pawlin PDF sakhan cu an va siim ih thilri bungrua pawl an laksak hnuah sakhan cu an urkang.

May 29 zan nazi 8:00 hrawngah zo ti theih lo pawlin an kap that. Tualsung mi pakhat in, “A hminpum cu ka thei lo, Ko Kala tin an ko ṭheu. PDF pawl umnak sakhan a zingzoi ih a theihfiang hnuah ralhrang hnenah a report. Ralhrang pawlin PDF sakhan an ciimnak ah a hramkaitu a si, sakhan sungih um thilri bungrua pawl a ru ih ralhrang hnenah a ap. Ohnhlut khua ah an kap that” a ti. Dalan Ko Kala cu zo pawlin an kap that ti theih a si hrih lo.

Thudang: Tualsung Mino Pawl An Sual’aw, Ralhrang In An Kap Ih (1) A Thi
Kayah State, Loikaw khua, tlangleng cawlhhmun kiangih um bualrawn sungah tualsung mino pawl an sualaw ciamco. Ralhrang pawlin meithal in an va kap ih pakhat an kap that, a thluak a pawt ih a hmun ah a thi cih.

Kiangkap ih um pakhat in, “Law Dhamma vengih mino pawl le Nan Baw Wan vengsung ih um mino pawl cu bualrawn sungah an sualaw ciamco. Train Station ih thlalang an deng kuai, ṭuanvo neitu in ralhrang pawl a sim thei. Ralhrang pawl cu an va thleng hngal ih mino sual’aw rero cu meithal in an kap. Mino pakhat ih lu ah an kap ngah, pakhat cu a kut ah an kai ngah. Mino 4 an kai” a ti.

May 27 sun nazi 3:00 hrawngah tualsung mino pawl cu buainak an nei ih an sual’aw, kiangkap ah mithmutu khal an um. Himi bualrawn ah mino pawl bawlung an sit ṭheu. Mithi cu Law Dhamma veng ih um kum 33 mi Aye Kuang a si, zanlam nazi 4:00 hrawngah tualsung mibawmtu pawlin a ruak cu an la ih zohdiknak nei dingin siizung ah an phur.

A ruak latu in, “Bualrawn sungah a thi. Cawkhal ṭheu a si, a innsang pawl hnen khalah thuhla kan sim zo, ralhrang pawl cu mi 6 an si” a ti. January thla ah Loikaw khua sungah ralhrang le mipi ralkap pawl an doaw ciamco. Ralhrang pawlin doawknak vanzam in an kah ciamco ruangah mipi ralkap pawl cu dung an sip, khuasung mipi pawl khal raltlan in an um. Thla 4 hnuah mipi pawl cu an khua ah an tlungsal ih veng pahnih ih mino pawl lakah hmuhthiam awklonak a thleng.

Be the first to comment

Leave a Reply

Your email address will not be published.


*