Ralhrang Pawlin Chin Pacang An That Ih An Urkang

Chin State, Falam peng, Zawlpi khua thar ih um Pa Za Hum Mang cu ralhrang pawlin an kai ih mipi ralkap kor an hruhter hnuah CNDF ralkap tin an that. Ralhrang thuthang sungah CNDF ralkap an that vekin an tarlang.

May 29 sun ah an khua ah ralhrang pawl an va lut ih khuasung mipi pawl cu an tlan, an tlannak ah Pa Za Hum Mang cu ralhrang pawlin an kai.

A naupa in, “Ka upa Za Hum Mang cu ralhrang pawlin PDF, CNDF vekin an that. CNDF Uniform an hruhter ih an urkang. Ka upa hi mi pangai a si, inn ih aum laiah khua ah ralhrang pawl an lut. Bags thawn a tlansuak ih ralhrang pawlin an kai ih an that.

Ka upa hi PDF a si lo, CNDF khal a si lo. Ka riahsia in ka thin naa tuk. A nupi le fanau a thihsan, ka upa hi kum 37 mi a si” a ti. Pa Za Hum Mang in a nupi le a fale 5 mual a liamsan.

CNO thuthang sungah ‘May 29 sun ah Falam peng, Zawlpi khua lam ih feh CNDF ralkap (2) cu ralhrang pawlin an kap ih Zawlpi khuami pakhat le CNDF ralkap pakhat an kap that. An ruak cu an urkang, CNDF ralkap pakhat in hliamhma a tuar” tin an tarlang.

Be the first to comment

Leave a Reply

Your email address will not be published.


*