Ralhrang Pawlin Hniarlawn Mino An Kap That, Nauhak Pawl Hruaisuak Dingin A Kir Lamah An Kap

Tuisun July 25, 2022 zinglam nazi 11:00 hrawngah ralhrang pawlin Hniarlawn mino kum 22 mi Salai Mang Lian Sang an kap that.

Tuizing ah ralhrang 100 hrawng cu ralthuam kimcang thawn Hakha ihsin an suak ih Hniarlawn khua ah an feh, khuasung mipi tam sawn cu an tlansuak.

Khuami pakhat in, “Tuizing ah ralhrang pawl an ra ih khuasung mipi pawl cu an tlansuak. Salai Mang Lian Sang in tlansuak thei lo mucu tlawnginn ih nauhak pawl hruaisuak dingin bike thawn amah lawngin a feh. Lamzin ah ralhrang pawl thawn an tong aw ih an kap that” a ti.

Salai Mang Lian Sang hi Hniarlawn khua ih an rinsanmi mino a si. Baptist Biakinn kiltu khal a si, a ruak cu khuasung mipi pawlin an la thei zo.