Ralhrang Pawlin Innsang Nubik An Pawngsual Ih An That, Lamzin Kap Ah A Ruak An Hlon

August 9, 2022 ah ralhrang pawl cu Magway, Seik Phyu peng, Paing khua ah an va lut ih khuasung inn le lo an siatsuah. Khuasung mipi pawl cu sahimnak hawl in hmun dangdang ah an tlansuak, cutawk ah ralhrang pawlin innsang nu Ma Hnin Wei cu an pawngsual ih an that hnuah a ruak cu lamzin kap ah an hlon.

A ruak khal taklawng in an hlon, a ruak an hmuh hnuah a pasal in hnipuan a sinter. An khua ah ralhrang pawl an lut tikah Ma Hnin Wei le a pasal khal ramlak ah an tlan ve, fanu pakhat le fapa pakhat an nei. An nupa in a thupten vok rawl pe dingin an khua ah an va feh.

Khualuhnak ah ralhrang pawlin an rak hmu ih meithal in an kap. An nupa in an tlan ih lamzin an ṭhen aw, Ma Hnin Wei cu ralhrang 5 in an kai ngah ih a pasal cu a tlansuak thei. Tualsung mipi ralkap pawlin cet zam thei drone hmangin an hawl ih lamzin kap ah thicia in an hmu.

A pasal in, “An pawngsual hnuah an that. Kan hmuh tikah hnipuan a hruh lo, a hniphuan cu a kiangte ah aum. Hmundang ah an that ih lamzin kap ah an ra hlon, a taksa parah hliamhma nasa zet aum ih an soisa nasa ti a theihtheih.

An kaihhremnak ah a kut pakhat ruh khal a kiak, a khukruh khal a siat. Kedam pakhat lawng a bun, a taksa parah meisa nawhnak hliamhma khal aum. An kai ih an kap that a si ahcun thuhran, asinan an kai ih an soisa ciamco hnuah rannung vekin an that cu ka riah a sia tuk, ka tuar thiam lo” a ti.

Be the first to comment

Leave a Reply

Your email address will not be published.


*