Ralhrang Pawlin Khuasung Mi 40 Lenglo An That, Fala 2 An Pawngsual

Sagaing, Yin Mar Bin peng, Yinpaungtaing khua cu ralhrang pawlin an nuai ciamco. An khua kiangkap ah mipi ralkap le ralhrang pawl an kap aw ṭheu. August 11, 2022 sun nazi 3:00 hrawngah ralhrang pawlin doawknak vanzam in Yinpaungtaing khua cu an kap, bomb an thlak.

Cun ralhrang 60 hrawng an thlah ih khuasung cu an nuai caimco. Ralhrang pawl an tlan hnu August 14 sun nazi 3:00 hrawngah tualsung mipi ralkap pawlin khua cu thianfainak an tuah. Mithi ruak hi 40 lenglo an um ding ti an zum, an rimsia tuk zo ruangah an urkang vivo ih mithi ruak an hmuh zat ngaingai cu an theifiang hrih lo.

Phun 9 kailai tleirawl kum 15 mi le fala kum 22 mi cu thicia in an hmu, taklawng in an um. An zohdik ih ralhrang pawlin an pawngsual hnuah an lu ah an kap that ti an thei. Mithi lakah Chin mino 2 an um ih Chinmi pahnih khal an thuhla theih a si lo, an hlo.

Myanmar National Armed Force-MNAF hotu in, “Kan va thleng tikah cun mithi ruak ṭhenkhat cu an rak urkang rero zo. Zo pawlkom in an urkang ti cu kan theifiang lo. Mithi ruak hi 30 & 40 lenglo an um ding. An rak urkang rero zo ruangah khuasung thianfai hna kan ṭuan.

Ralhrang pawl hi khuasung ihsin an suak zo nan khua kiangkap hrawng ah an um lai men thei, khuasung khalah bomb an kam men thei. Curuangah tualsung mipi pawl cu khuasung ah kan lutter hrih lo, khuasung kan thianfai hnu lawngah mipi pawl cu kan lutter ding” a ti. Yinpaungtaing khua ah inn 1000 lenglo aum ih tualsung mi a thawngtel cu raltlan in an um.

Be the first to comment

Leave a Reply

Your email address will not be published.


*