Ralhrang Pawlin Kum 10 Sung Thawngtla Dingin A Thu An Ṭhencat Hnuah Kum 3 Tla Bet Dingin Thubuai An Orhter

Ralhrang pawlin fala Ma Thinzar Zaw cu an kai ih kum 10 sung thawngtla dingin a thu an ṭhencat, cumi hnuah kum 3 tla bet dingin thubuai an orhter ih kum 13 sung thawngtla dingin thawnginn sungah an khum.

Ma Thinzar Zaw cu Dagon University Students Union pawlkom ah a tel. September 14 ah an umnak Kyauktada inn ah ralhrang pawlin an va lutchilh ih inn sungih um a rualpi pawl thawn an kai. November 8 sun ah rampi cozah dodal tin pukmah 124-b (a) in thiamlo an coter ih kum 10 sung thawngtla dingin a thu an ṭhencat.

Cumi hnu tuisun December 8 ah court ah an hruaisal ih pianphuang boruak siatsuahtu tin pukmah 505 hmangin thubuai an orhter bet ih kum 3 sung thawngtla dingin a thu an ṭhencat. Dagon University Students Union ṭuanvo neitu in, “Kum 3 sung thawngtla bet dingin a thu an ṭhencat sal, Ma Thinzar Zaw cu kum 13 sung thawngtla dingin thubuai an orhter” a ti.

Ma Thinzar Zaw hi Dagon University ah kumthumnak zirlai a si, tha-naa damlonak a neih ruangah siivai ei, sii dawt’aw ṭheu. Damlo cingten ralhrang pawlin an kaih ruangah a innsang pawl cu an thinhar zet.

Ma Thinzar Zaw thawn an kaihtlang mi a rualpi pahnih khal kum 10 sung thawngtla dingin thubuai an orhter veve. Ralhrang pawlin ramsung thuneihnak an lak hnuah tlawngta, mino pawl cu an kai vivo ih thubuai phunphun an orhter hnuah kum tampi sung thawngtla dingin hremnak an pe.

Be the first to comment

Leave a Reply

Your email address will not be published.


*