Ralhrang Pawlin Mi 11 Cu Hridai In An Tawnbet Ih An Urthat, An Ṭap An Raak Rero

Sagaing, Salingyi Township, Dontaw khuami 11 pawl cu ralhrang pawlin an kai ih hridai thawn an tawnbet hnuah an khuapawn ah an hruai ih an urthat thluh. Tualsung mi pakhat in, “Khuami 11 pawl cu an nung lai rori in an urthat, an ṭap an raak ciamco au-aw cu kan thei nan kan va run thei lo” a ti.

Mizan December 6, 2021 ah Monywa-Pathein lamzin ah ralhrang pawl cu bomb puah an tong ih ralkap tam zet an thi ih hliamtuar khal an um. Ralhrang pawl cu an thinheng tuk ih tuizing December 7 ah bomb puahnak kiangkap ih um khua pawl cu an nuai ciamco.

Khuasung inn le lo pawl an siatsuah ih meithal an kap ciamco, cumi hnuah Dontaw khua kiangah bomb puah an tongsal. Ralhrang pawlin Dontaw khua cu bomb, pukpi le meithal in an kap ciamco hngal ih khuasung mi 11 cu an kai ih zinglam nazi 9:00 hrawngah an urthat thluh.

Tualsung mi pakhat in, “Zinglam nazi 8:00 hrawngah ralhrang pawl cu SuiTakung ihsin an ra ih khuakhat hnu khuakhat an nuai vivo. Cutawk ah Pindaya khua kiangih um khuami pakhat an kap that, khuadang mipi pawl cu an tlan ciamco ih Saba lilawn ah ralhrang pawlin bomb in an rak puah, bomb le pukpi in khuasung lam an kap ciamco.

Dontaw khuasung ah an lut ih sualnak nei lo khuasung mi 11 cu hridai in an tawnbet ih khuapawn ah an urthat, ralhrang pawlin Dontaw khua an suahsan zo ih Lyping tlang parah umhmun an va khuar. Khuasung mipi pawl cu hmun dangdang ah an tlan thluh” a ti.

Be the first to comment

Leave a Reply

Your email address will not be published.


*