Ralhrang Pawlin Mipi Ralkap An Kai Ih An That, Thla 6 Hnu Lawngah A Thih Thu An Thei

Bago khawpi ih um mipi ralkap Ko Thiha cu ralhrang pawlin an kai ih an hrem that, a thih thu cu thla 6 hnu lawngah an thei. Ramsung a buai hnuah Ko Thiha cu mipi ralkap ah a lut. Khua ah ava tlung lawk ih dalan ruangah ralhrang pawlin an rak kai.

January 19 sun ah an sungkhat mi pahnih thawn ralhrang pawlin an kai. An kaih hnuah an sungkhat pawlin an umnak an thei nawn lo. Ralhrang pawlin an hrem ciamco ih an kaih hnu ni 3-nak ah Ko Thiha cu a thi, midang pahnih cu an thi lo ih kum 8 sung thawngtla dingin an thu an ṭhencat.

Ralhrang pawlin Taungoo khua ah an rak hruai, thla 6 hnu lawngah an sungkhat pahnih cu an tong thei ih Ko Thiha ih thih thuhla an sim.

Tualsung mipi ralkap in, “Minung pathum an kai ih Ko Thiha cu an hrem that. A thuhla thei dingin caan reipi sung kan rak zingzoi rero, thla 6 hnu lawngah kan theifiang. A ruak khal an ngah lo, a innsang hnen khalah a thih thu hi an sim thei lo. A thih thuhla cu an kaihmi pahnih in an rel, an kaihmi pahnih khal kum 8 sung thawngtla dingin an khum” a ti.

Ko Thiha in a nupi le a fanu a thihsan ih an harsa zet. An inn neitu in innluah a siang nawn lo ih a dawisuak ruangah umnak ding an nei nawn lo. Bago mipi ralkap ṭuanvo neitu in, “Hringnun ah na ra piangsal asilen ram zalen Democracy ram ah piang hram aw” tin Facebook cahmai ah a tarlang.

Be the first to comment

Leave a Reply

Your email address will not be published.


*