Ralhrang Pawlin Mucu Tlawnginn Ah Tualleng Kum 4 Mi An Va Kai

Yangon, Ahlone ah ralhrang pawlin tualleng kum 4 mi an kai ih a ṭap rero nan zangfahnak zianghman nei loin an hruaisuak. April 5, 2022 simlam ah ralhrang pawl cu BC mucu tlawnginn ah an va lut ih tlawng sayama le nauhak pawl cu khuk an bilter thluh, meithal in an tin thepthep ih nauhak kum 4 cu an kai.

Ralhrang pawl cu nauhak kum 4 mi kai dingin DC motor pakhat, family motor pakhat le palik motor pakhat thawn an vengsung ah an lut. An vengsung khal an phit thluh ih nauhak kum 4 mi cu an kai.

Vengsung mi pakhat in, “Nauhak ih nulepa cu PDF pawl nan bawm tin an kai tum ih hmun dangah an tlanhlo. Curuangah an fapa kum 4 mi le a pu cu ralhrang pawlin an kai. Simlam naz 3:15 hrawngah BC mucu tlawnginn sungah an va lut, an lakah ralhrang kuthnuai ih veng lal ṭuan khal a telve.

Tlawng sayama le nauhak pawl cu khuk an bilter thluh, tlawng sayama in ‘Nauhak hi ka lo pe thei lo, keimah in ka cawm ding’ arak ti nan an duh lo ih an hruaisuak thotho. Zianghman theithiam hrih lo nauhak kum 4 mi parih an thiltuah cu a rapthlak tuk, nauhak ih thinlung ah hliamhma nasa zet aum ding” a ti.

Ralhrang pawlin ramsung thuneihnak an lak hnu February 1, 2021 ihsin April 5, 2022 tiangah khuasung mi 10,054 zat an kai zo ih mi 1,976 cu kai dingin an hawl rero lai tin AAPP ah an ngankhum.

Be the first to comment

Leave a Reply

Your email address will not be published.


*