Kalaymyo thlanglam Tharyarkone khuami (2) cu August 4, 2022 ah ralhrang pawlin an kai ih an that. Khuasung ah tlansuak thei lo mi 30 hrawng an tang lai.
Kalay University ih umhmun khuar ralhrang pawl cu August 3 sun ah Tharyarkone khuasung ah an va lut, khuasung mi 30 hrawng cu an tlansuak thei lo. Cumi lakah mi 2 cu August 4 sun an that.
Tualsung mi pakhat in, “Ralhrang pawl an ra lut laiah an tlansuak lo, a thaisun ah ralhrang pawlin an kai ih an that. Hriamkai pawl thawn pehtlaih awknak zianghman an nei lo, daiten um ih lo hnaṭuan mi an si” a ti.
An that mi pahnih cu mipa kum 60 mi le kum 45 mi an si. Ralhrang pawlin an kaihmi khuasung mi (3) an hruaisuak ih mithi ruak cu an phumter. Tu’ah ralhrang pawl cu Tharyarkone khuasung ah umhmun an khuar ih khuasung inn 10 hrawng an urkang.
Tharyarkone khua ah inn 360 aum ih mipum 1500 kiangkap hrawng an khuasa. Chin mipi pawl umnak khua pakhat a si. Tharyarkone khua kiangkap doawknak ruangah khuasung mipi pawl cu kiangkap khua ah raltlan in an um.
Leave a Reply