Ralhrang Pawlin Tleirawl Kum 14 Mi An Sualpi Hnuah An Urthat

Magway peng, Gangaw ramsung, U Hle Hlaw khua ih um tleirawl kum 14 mi cu ralhrang pawlin an sualpi ciamco hnuah an urthat. Hringtu a pa kum 52 mi U Aung Ye thawn tlanglo ah hnaṭuan in an um ṭheu. Vate le ramsa pawl an kai ih khuasung ah an zuar ṭheu, hanghnah hangrah pawl an la ih an zuar.

April 4, 2022 sun ah an lo hnaṭuan laiah ralhrang pawl thawn an tongaw ih an kai ih hridai in an tawnbet hnuah khuasung ah an hruai. Khuasung mipi pawl cu ralhrang pawl an ra ti an theih ruangah an tlanhlo thluh man, nikum ihsin an khua ah ralhrang pawl vei-4 an va feh zo ih inn 38 an urkang zo.

An khua ah ralhrang pawl an ra ti an theih veten khuasung mipi pawl cu hmun dangah an tlanhlo, asinan U Hle Hlaw tei pafa in phone an neih lo ruangah an pehtlaih thei lo. An khua kiang ramlakah hanghnah hangrah hawl in an rak um ih ralhrang pawlin an kai.

Khuami pakhat in, “Ṭih thlaphang zetin khuasung ah kan va lut ih innkang pawl kan mit ih U Aung Ye tei pafa ruak kan hmu. A fanu Ma Moe Moe Htwe ih kaa cu puan in an huppit ih hridai in an tawn, an pawngsual hnuah an nungdam lai in an urthat” a ti.

An kaih zan ah ramlak ih um pawlin Ma Moe Moe ih ṭap thawm, raak thawmvang an theithei nan an va bawm thei lo. Ma Moe Moe ih ruak kiangah nunau serh lem pathum hman zo mi khal an hmu. Ma Moe Moe hi kum 2 mi a si laiah hringtu a nu in a thihsan, u mipa kum 16 mi le u nunau pakhat anei.

Fanu nautabik a si vekin a pa in a seherh thei tuk ih ramlak ih a feh tinten a hruaitel ringring. Ralhrang pawlin a fanu cu an sualpi ciamco laiah a ningnaa tuk ih a au ciamco ruangah ralhrang pawlin a nunglai in an urthat, a fanu khal an sualpi hnuah an urthat.

A upa in, “Ka pa le ka farnu an that thuhla ka thei cu ka riahsia tuk, sumpai kan neih lo ruangah hmun dangah hnaṭuan in ka rak um. Ziang tuah thei mi ka nei lo, a netabiknak ah ka pa le ka farnu ih hmel ka hmu duh nan ka hmuhmi cu an ruhro lawng a si” a ti.

Ralhrang pawl cu mipum 70 hrawng an si ih an khua inn pawl an urkang sak. Ramsung a buai vekin mi pawngsualtu ralhrang pawl hremtu ding thuṭhennak zung aum nawn lo. Thuṭhentu U Gyi Myint in, “2008 daanhrampi ah ralhrang in sualnak an tuah asilen mipi thuṭhennak le palik zung ah thuṭhensak a theih nawn lo.

Sual tuahtu ralhrang cu palik in an kai asikhallen anmah ralhrang pawlin an va hruaisuak ṭheu, ziangvekin hremnak an pe ti khal kan thei nawn lo. Tuiṭum ah nauhak kumkim hrih lo, kum 14 mi an pawngsual hnuah an urthatmi cu daan le dun vek asilen sualtuahtu hi thihdaan orhter theih a si” a ti.

Be the first to comment

Leave a Reply

Your email address will not be published.


*