Ralhrang Sakhan Kiangih Motor Mawng Innsang Member 3 An Kap That, An Fapa Kum 3 Mi Khal An Kap That

Shan State, Mong Hsu peng, Tangyan lamzin ah ralhrang pawlin innsang member 3 an kap that. July 18, 2022 zan nazi 7:00 hrawngah ralhrang sakhan kiang lamzin ah motor an mawng ih ralhrang pawlin san um loin an kap that.

Innsang pabik kum 23 mi Sai Thiha, a nupi kum 20 mi Nan Sai Lu le an fapa kum 3 mi cu Tuang Howe khua ihsin an khua lamah an tlung ih lamlak ah ralhrang pawlin an rak kap ciamco. Innsang nubik le a fapa cu a hmun ah an thi, innsang pabik cu siizung ah a thi.

Tualsung mi pakhat in, “An motor cu ralhrang pawlin an rak kap ciamco, an motor thlalang khal a kuai thluh. Innsang pa hi vei 6 an kap ngah, a fapa khal a awm ah an kap ngah. A nupi ih hngawng ah an kap ngah.

A nupi le a fapa cu a hmun ah an thi cih, innsang pabik hi an kap ngah tambik nan a thi hngal lo. Khuami pawl a phone thei lai ih an thilton cu a sim thei, khuasung mipi pawlin an va thiar ih zan nazi 11:00 ah a thi” a ti.

Mong Hsu ramsung ah ralhrang le Shan ralkap SSPP/SSA pawl ih dinhmun a áš­ha lo. Ralhrang pawlin SSPP/SSA sakhan pathum cu hmundang ah thawn aw dingin an fial, July 21 hlanah thawn aw dingin an fial ih an thawn aw lo asilen kap aw thei dinhmun an si.

Be the first to comment

Leave a Reply

Your email address will not be published.


*