Ralkap CDM Lut 800 Hrawng An Um Zo

Ralkap in thuneihnak an lak hnu February 1 ihsin Min Aung Hlaing kuthnuai ih hnaṭuan duh nawn lo ralkap le palik an tam zet. CDM ih lut ralkap 800 hrawng an um zo tin ralbawi ṭuan zo Lin Htet Aung (kum 29) in Myanmar Now thuthang hnenah a sim.

Lin Htet Aung cu Shan state, 528th Infantry Battalion ih ralbawi a si nan Min Aung Hlaing kuthnuai ah hna a ṭuan duh nawn lo ih March thla ah CDM ah a lut. Hmunhimnak ah aum ih mino pawl doawkdan a zirh rero lai, an camp ah CDM ih lut ralkap/palik pawl khal an um.

CDM lut ralkap 100 hrawng cu ralkap sinak sang zet kaitu pawl an si, major, captain le lieutenant pawl khal an tel. CDM ih lut ralkap lakah ti ralkap le van ralkap pawl an tam bik, leilam ralkap cu an tam lemlo a ti.

Lin Htet Aung in “Leilam ralkap pawl cu doawknak tualrawn ih hmainortu an si ih hringhronak hnuai ih an um ruangah an tlan ngam lo. An innsang pawl thawn an umtlang lo ih an tlan asilen an innsang pawlin an rak tuar ding ti an phang ruangah an tlan ngam lo” a ti.

Lin Htet Aung in “Ralkap sinak sang pawl cu kan beisei lo, an sinak a sang poh len an sinak hloh ding an phang deuhdeuh. Kei cu dunglam ah ka kirsal nawn lo ding, mino pawl thawn dothlennak ah ka tel vivo ding” a ti.

Be the first to comment

Leave a Reply

Your email address will not be published.


*