“Ralkap Cozah Cu Pathian Vekin Bia Uh” Titu Phungyi Cu Insein Thawnginn Ah Aum Lai

Phungyi Wirathu in “Ralkap cozah hi pathian vekin bia uh” tin tlang arak au rero zo, Myanmar san thuanthu ih ralkap pawl cangvaihnak ah phungyi Wirathu cu arak telve ringring. Ralkap pawl ih kut pakhat vek a si.

Sakhua dang hi a hua zet ih abikin Myanmar ramsung ih Muslim sakhua cu a do ciamco, leitlun ram dangdang pawl khalin Wirathu cu “Ralhrang pawl ih phungyi” tin an thuthang cahmai ah an tarlang.

NLD cozah in Wirathu cu sakhuanak fehsual ih tlangau an ti ruangah thusim an siang nawn lo ih kai dingin thubuai an orhter, cutin Wirathu cu hmun dangah a relh ih NLD cozah cu a do. 2020 kum Myanmar ramsung an hrilawk hlante ah NLD cozah in Wirathu cu an kai ih Insein thawnginn ah an khum.

Cumi hnuah ralkap in thuneihnak an la ih Wirathu cu an suah zalen hngal dingah an ruat nan tuini tiang an suah hrih lo ih Insein thawnginn ah aum lai cu mipi in mak an ti tuk. Wirathu thawn thawngtla tlang pathum Bu Let Hla Swe Tun, Michael Kyaw Myint le U Htay Aung cu ralkap cozah in an suah hngal nan Wirathu cu an suah lo.

June 12 ah Military Council Press Conference an nei ih USDP party nunau pakhat in Wirathu thuhla a sut, ralkap thuphuangtu Zaw Min Tun in “Ka thei lo” ti lawngin a let.

Wirathu thuhla buaipitu Sayadaw U Pa Mauk in “Ralkap in Wirathu cu an humhim tum ruangah an suah lo a si ding. Wirathu hrangah lenglam hi a him lo tuk, tulai caan ahcun ralkap lamtang pawl cu an that rero ruangah Wirathu hrangah thawnginn hi a him sawn.

Thawnginn ah aum nan a zalen, a nuam theibik in an ret ko ding, Wirathu cu ralkap pawl ih kut pakhat vek a si ruangah thawnginn ah an humhim a si ding, Wirathu hrangah lenglam a him lo an ti ruangah kumkhua thawnginn sungih an ret ding cu a cang thei cuang lo” a ti.

Asinan, Myanmar ramsung buainak pawl zingzoitu AAPP sungṭuan pakhat cun “Ralkap pawlin an hmang duh nawn lo ruangah a si ding.

An hmang duh lai caan ah an hmang zo, tu’ṭum ah thawnginn ihsin an suah zalen ih an hmangsal ding asilen ralkap hrangah thil ṭihnung a thleng thei sawn ti an thei a si ding” a ti. Ralkap in Myanmar ramsung thuneihnak an lak hnuah Min Aung Hlaing cu Mon ramsung ah ralkap lamtang phungyi upa pawl an va tong zo.

Be the first to comment

Leave a Reply

Your email address will not be published.


*