Ralkap Ih An Kaihmi Chin Mino 5 Ih Thuhla Theih A Si Lo

Ralkap in sualnak nei lo Chin mino 5 an kai ih tuini tiang an innsang pawl thawn an pehtlaih aw thei hrih lo ruangah an innsang pawl cu thinhar in an um.

Chinram, Paletwa khuasung ah May 28 sun ah bomb veihnih a puak, curuangah ralkap in miharsa pawl bawmtu mino 18 cu an kai. An kaihmi 13 cu an suahsal nan 5 cu June 17 sun ah pukmah 505 hmangin thubuai an orhter.

An kaihmi 5 pawlin Mindat raltlan hrang sumpai an khong ih an ngahmi sumpai ting 20 lenglo cu Paletwa Myanmar Economic Bank ihsin Mindat Myanmar Economic Bank ah an kuatsawng ti an theih ruangah pukmah 505 in thubuai an orhter.

An kaihmi Chin mino 5 pawl ih hmin cu Ko Aik Min (Hlasakthiam), Aik Tun Min (Forest hnaṭuan), Aung Tun Soe, Aik Tun Min (Company hnaṭuan) le APCDF director U Ya Kyaw pawl an si.

June 18 sunah Paletwa ihsin Rakhine State, Sittwe khua ah an kuat ih an innsang pawl thawn an pehtlaihaw thei nawn lo. June 30 sun ah court hmai ih lang ding an si nan an lang lo ih July 14 ah an kosal tin Paletwa mipi pawlin an rel.

Be the first to comment

Leave a Reply

Your email address will not be published.


*