Ralkap In Veithum Rori Thailand Ramsung Ah Bomb An Kap Puak

Myanmar ralkap pawlin pukpi an kap ciamco ih Thailand ramsung ah veithum rori an va kap puak ngah. March 17 ah Karen ralkap pawlin Tanlung tivakap ih um ralkap sakhan 5 cu an rak do ciamco ih an laksak thei.

An meithal le an ralthuam pawl khal an laksak. Himi sakhan ah ralkap 100 hrawng an um ih ṭhenkhat cu hliamhma thawn Thailand ramsung ah an tlanlut.

Thailand ralkap hnenah bawmnak an dil ih hmundang ah an hruai, cutin Tanlung tivakap ih Mae Tri Tha Camp ah an thlah. Mae Tri Tha Camp cu ralkap sakhan tum zet a si ih Helicopter tumnak khal aum.

Ralkap pawl ih umhmun khuarnak tumpi a si ih ei le in ding, ralthuam pawl khal hitawk sakhan ah an ṭhum aw ṭheu. Karen ralkap KNLA pawlin Mae Tri Tha Camp cu lak an tum ih an kulh thluh.

Curuangah Kawl ralkap pawlin an rak kap ciamco ih Thailand ramsung, Mae Hong Son province, Mae Kha Hta khua kiang ih loram sungah bomb veithum rori an kap puak ngah. Bomb puak in ziangvek thilri pawl a siatsuah ti cu theih a si hrih lo tin Nation 22 Thai News Agency ah an tarlang.

Be the first to comment

Leave a Reply

Your email address will not be published.


*