Ralkap In An Hrem Nasa Tuk Ruangah Mipi Hrangah Oxygen Bur Aiah Meithal A Keng Sawn

Yangon, Yankin Township ih um mino kum 17 mi Zeya cu Covid-19 volunteer a si. Myanmar ramsung ah Covid-19 thlisia veikhatnak, veihnihnak a hrang laiah Covid-19 volunteer arak ṭuan. Asinan Ralkap in thuneihnak an lak hnu ihsin an cangvai thei nawn lo ih mipi lamzawhnak ah a tel.

Yangon ih bomb puak ruangah rinhlel thu in a rualpi pawl thawn an kai ih ni 10 sung cu thi zik te in an hrem, ti le rawl khal an pe lo ih an vuak ciamco. Cutin, an vuak hnuah ni sa lakah an pho ih zanah cun leilung ah an phum, a lu lawng an langter ih an phum.

An vuaknak ruangah a lu khal a kuai ih a taksa cu hliamhma in a khat, a taksa hliamhma pawl cu boot thitnak hrih in an ṭhipit. An hrem tinten ‘Khuitawk ahso bomb tuahdan na zir?’ tin an sut ih zianghman a theih lo ruangah an vuak naa deuhdeuh.

Zeya in “In hrem nasa tuk ruangah thih khal ka ṭih nawn lo, kan thi asilen ka na tuar mi pawl a ziaum sawn ding tin ka ruat” a ti. “Ka tihal tuk” a ti asilen napin an sit ciamco hnuah ekinn tidai in an tawih, a tihal tuk ruangah a hmai ih tidai for cu a thei dandan in a liak ṭheu.

Ekinn tidai ava in duh ruangah a ek suak tin vei tampi thuphan a per ih ekinn tidai cu khopkhamten a in ṭheu. Cumi hnuah Insein thawnginn ah an khum ih kum a kim hrih lo ruangah hmun dang thawnginn ah an thawnsal. Cutin, June 9 sun ah a innsang pawlin an bail suak ih Covid-19 volunteer khal ṭuan nawn loin ralkap pawl a do tum thlang.

Thawnginn ihsin a suah veten “Ka hliamhma tuar mi ruangah ralkap pawl ka dosal ding” tin online parah a thlah. A thaizing ah ralkap pawlin kai dingin an inn ah an va feh nan Yangon arak suahsan zo, ramri ah raldodan zirnak hmun ah aum zo ih ralkap pawl dodan ding a zir rero lai.

A thawngtlakpi a rualpi pawl ih thuhla cu a thei nawn lo, thawnginn sungah an um lai ding ti a zum. Zeya in “In kaisal asilen nungdam in ka ra suak nawn lo ding” a ti. Mipi hrangah oxygen bur a keng nawn lo ih meithal a keng thlang. Zeya in “Tu hi game cemnak a si” tin ralkap pawl ih game lekmi cu cemter ding hmalaknak anei rero lai.

Be the first to comment

Leave a Reply

Your email address will not be published.


*