Ralkap In An Hremnak Ruangah A Kut, Keruh A Kiak, A Hna A Set Ih A Hliamhma Tuar Loin A Thi

Nay Pyi Taw, Pyinmana khua ih um mipa kum 29 mi Ko Yan Paing cu ralkap pawlin thu an sut ih an hremnak hliamhma ruangah tuisun October 1, 2021 ah mual a liam. Ko Yan Paing cu May 2 ah a relhnak inn pakhat ah puak thei thilri thawn ralkap pawlin an kai.

Cumi hnuah amah thawn pehtlaihaw tin mino 3 an kai bet, Ko Yan Paing cu an hrem nasa tuk ruangah a kut, keruh pawl a kiak ih amahten a feh thei nawn lo. An vuaknak ruangah a hna khatlam a set.

An sungkhat in “Thusutnak hmun ah nasa zetin an vuak, an hrem. Na thurelmi a bangaw lo tin an vuak ciamco ruangah a hna a set. Amahten khal a feh thei nawn lo” a ti. A taksa zaten ah an vuak, an velhnak hliamhma a khat thluh nan an tuamhlawm duh lo.

Cutin an hrem hnu ni 8-nak ah Nay Pyi Taw thawnginn ah an kuat, a innsang pawlin thawnginn sungah a hliamhma pawl tuamhlawm sak dingin an dil nan an cohlang lo. Cun, a innsang pawlin siivai an kuat nan a hnenah a thleng lo, hliamhma nasa zet tuar phah in thawnginn sungah an khum.

A rualpi pawlin “Miṭha zet a si, a thinlung khal a pacang tuk. Amah thawn lamzawh tlang cu thazang kan ngah thei tuk” tin media hnenah an sim thei. September 26 ahcun a bese tuk zo ruangah siizung ah an fehpi nan ṭhalam a pan thei nawn lo ih October 1, 2021 sun ah a thi. Amah thawn an kaihtlang mi mino 3 cu an harhdamnak a ṭha ih thusutnak hmun ihsin thawnginn ah an kuat zo.

Be the first to comment

Leave a Reply

Your email address will not be published.


*