Ralkap In An Kahmi Chin Mino Ih Hliamhma Cu Lai Meithal Ih Kahnak Hliamhma A Si

Sagaing, Tamu, New Zalenphai khua ih um Chin (Kuki) mino 6 cu July 10 zanah ralkap pawlin an rak kap ciamco ih a hmun ah pahnih an thi, pathum cu hliamhma thawn an kai ih pakhat cu himdamten a tlansuak thei.

An kaihmi 2 khal ralkap kutsung ah an hliamhma tuar loin an thi, an kaihmi pakhat Sat Min Lun cu a pum ah an kap ngah ih July 12 sun nazi 12:00 hrawngah an suahsal. Mithi 4 ih ruak cu an innsang hnenah an pe lo ih ralkap pawlin an phum.

An hmin cu Ngam Chin Pso, Dou Kho Lel, Mang gou le Pao Gin Mang pawl an si. Sat Min Lun cu hliamhma thawn an suahsal ih an innsang pawlin siizung ah an tlanpi. Sibawi in a pum ih hliamhma cu X-ray in an rak zoh ih meithal thawn an kahnak ruangah a pum ah kua/pawp 8 aum, a kua tum pawl cu Surgery an tuah cih.

Cun July 14 sun ah a pum ih kua te pawl cu India siizung ah Surgery an va tuah. Vengsung mi pakhat in “Ramsung siizung ih sibawi in bomb hliamhma a si ding a ti. Asinan, ralkap pawlin an kah laiah bomb an hmang lo, a taksa parih cerek mu cu Lai meithal ih an hmanmi zian a si.

Ka zumdan cun ralkap hnenah Pyu Saw Htee pawlkom an um a si ding. Asilolen ralkap hnenah ralkap lamtang mipi į¹­henkhat an um ve ih an kengmi meithal a si men ding ti ka zum. Meithal thawn an kahnak ruangah a pum ah a kua/pawp 8 rori aum” a ti.

Be the first to comment

Leave a Reply

Your email address will not be published.


*