Ralkap In An Kaihmi Nauhak Kum 7 Mi Le A Uite An Suah Hrih Lo

June 30 sun ah thuneihnak latu ralkap in thawngtla 2,200 lenglo an suah zalen, thawngtla nauhak bik kum 5 mi Ma Su Thet Wyne khal an suah zalen. Asinan, nauhak mipa kum 7 mi Maung Aung Thukhamein Lin le a uite cu an suah hrih lo.

Maung Aung Thukhamein Lin ih nu Dr. Htar Htar Lin cu Ministry of Health and Sports ih director ṭuanlai a si. Asinan, ralkap in thuneihnak an lak hnu ihsin a ṭuan duh nawn lo ih CDM a tuah ruangah ralkap pawlin June 10 ah an nufa in an kai.

June 12 ah ralkap pawlin Dr. Htar Htar Lin cu ralkap cozah dodal in CDM a tuah, cun tapung pawlkom National Unity Government (NUG) thawn hna an ṭuantlang ruangah Article 17 le Article 505(a) in thubuai orhter a si tin an phuang.

Dr. Htar Htar Lin le a fapa kum 7 mi, an uite ih umnak cu zohman in an thei lo ruangah an seherh zet. Dr. Htar Htar Lin ih hmeltheih doctor pakhat in “A fapa cu a fimvar zet, a uite thawn an kai.

Ni 21 sung an kai zo ih ziangtlukin an hrem zo ding, nauhakte a si lai ih an hremnak ruangah a khuaruahnak a siatsuah thei. An suah lohli theinak dingah thlacamnak in rak bawm cio uh” a ti.

June 30 sun ih an suah zalen mi nauhak kum 5 mi Ma Su Htet Wyne khal an hremnak ruangah a khuaruahnak a ṭha lo thu theih a si. Ma Su Htet Wyne in “Thawnginn sungah rawl khopkhamten in pe lo, takkolh tik khalah ekinn tidai thawn tak ka kolh ṭheu” a ti.

Ma Su Htet Wyne ih pa cu ralkap pawlin kaih an tum ih an kai ngah lo ruangah a nupi le fanau pawl an kai, June 30 ah an suah zalen sal ih ralkap pawlin an innsang pabik Ko Soe Htay cu kaih an tum lai ruangah hmun dangah an tlan.

Be the first to comment

Leave a Reply

Your email address will not be published.


*