Ralkap In An Kap Ih Siizung In An Rak Tuamhlawm Duh Lo Ruangah A Thi

Mandalay, Pyigyidagun khua ih um tlangval kum 23 mi Maung Su Paing Htwe (B) Paing Paing cu ralkap pawlin an kap ih siizung in an rak tuamhlawm duh lo ruangah a thisen suak tamtuk in a thi.

Innsang harsa zet ih thanglian a si ih hnaṭuan in a nulepa a cawm, a mit khatlam lawng a ṭha. June 14 zan nazi 11:00 hnuaiah a rualpa ava thlah, a tlai tuk zo tin a rualpa cu a seherh ruangah bike thawn an sawng ah ava thlah.

Cutin, a tlunglam ah lamzin ah ralkap pawl thawn an tongaw ih an kap ciamco hngal. Vengsung mi in “Meithal awn vei 20 hrawng kan thei” an ti, ralkap pawlin an dum vivo ih a pum ah an kap ngah.

A pum ih hliamhma thawn bike cu a mawng vivo ih an inn kiang a thleng zawngah a tlu. A innsang pawlin siizung dangdang ah an tlanpi nan an rak cohlang lo, an tuamhlawm duh lo ruangah zinglam nazi 4:00 ah a thi.

Ziangruangah an tuamhlawm duh lo ti cu theih a si lo, ralkap pawl an ṭih ruangah maw si ding. Maung Su Paing Htwe ih ruang cu June 15 ah an vuiliam ti theih a si.

Be the first to comment

Leave a Reply

Your email address will not be published.


*