Ralkap In An Rualpa An Kap Tla Hnuah Mino 5 Cu Inndot Par Ihsin An Dawt Ih An Thi, An Ruak Lak Khal An Siang Lo

Yangon, Botahtaung Township, 44 lamzin kap ih um inndot number 38-nak ah mino pawl umhmun an khuar. Dalan pawlin an rak theihthup ruangah ralkap hnenah an sim thei.

August 10, 2021 sun ah ralkap tam zet cu meithal le ralthuam kengin an inn cu an va kulh thluh, an va luchilh ih inn par lamah an kaiso. Mithmutu in “Inn par ih um Kaung Min Thant an kap ih a tla, a rualpi pawl khal kutkai aw in an dawp ve cih” a ti.

An inndot hi a sang tuk ruangah an tla that thluh, mithi lakah nunau khal an tel. Inn par ihsin dawp ve lo mino 2 khal an kai ih ralkap sakhan ah an hruai. Mithi 6 ih ruak cu lak an siang lo ih ralkap pawlin an phum tum.

Mithi 6 ih hmin cu Kaung Min Thant, Ye Min Oo, Wai Yan Htet, Min Thitsar Aung, Ma Way Way Miang le Ko Wai Zaw pawl an si. Inn par ihsin dawt ve lo Thiha Kaung Set le Ma Poe Kyaw Kyaw cu an kai.

“Mino pawl cu ziang an tuah ti an zingzoi rero lai, an kaihmi 2 cu thu an sut rero lai. An umnak innkhan sungah thilri an hmuh ruangah thubuai an nei an tiih an ruak lak khal an siang lo.

Curuangah an innsang pawl hnenah an ruak an pe lo ding, ralkap in an phum tikah an ko leh ding. An ruak zukpi le thil dangdang tuah khal an siang zik lo, ralkap pawl ih duhdan vekin an phum hngal ding. Tu’ahcun an zingzoi rero lai’ tin ralkap pawl hmeltheih pakhat in a rel.

Be the first to comment

Leave a Reply

Your email address will not be published.


*