Ralkap In An That Ih An Phum Hngal

Mandalay, Pyigyidagun khua ih um tlangval kum 20 mi Ko Wai Phyo Aung cu ralkap in an kap that hnuah an phum hngal. An vengsung ralkap lamtang, dalan U Tin Tun in mi loram a laksak, ralkap ih bawmnak in mi loram cu a lonsak.

June 28 zinglam nazi 9:00 hrawngah loram neitu le dalan cu tongkam an el’aw, loram neitu cu Ko Wai Phyo Aung ih hmeltheih a si ruangah ava zoh ve. Cutin an buai ruangah U Tin Tun in ralkap pawl a ko.

Ralkap pawl an va thleng veten an kap ciamco hngal ih Ko Wai Phyo Aung cu a hmun ah a thi cih. Midang 2 khal hliam an tuar ih an kai.

June 29 zan ah “Loram buainak thuhla cu ralkap pawlin an va tifel tum ih tlakrawh thawn an rak deng ciamco ruangah ralkap in an kap ve. Mi pakhat an kap ngah ih 2 cu hliamtuar in an kai” tin ralkap thuthang ah an phuang.

Mithmutu pakhat in “Zohman in ralkap an deng lo, an do lo. Lo neitu le dalan lamtang pawl cu hmun dangdang ah an ding khawm veve, ralkap pawl an va thleng veten an kap ciamco hngal” a ti.

Ko Wai Phyo Aung innsang pawlin ralkap sakhan ah a ruang an va dil nan an rak pe duh lo, a thih lai zuk lawng an rak hmu. Ralkap pawlin an phum hngal ruangah a ruak um loin a innsang pawl vuinak caanserh an tuah.

Be the first to comment

Leave a Reply

Your email address will not be published.


*